គណៈកម្មការអ្នកស្ម័គ្រចិត្តនៃគណៈកម្មាធិការជាតិCAMSOC-CAMAPGOC សហការជាមួយសហភាពសហព័ន្ធយុវជនកម្ពុជា សូមជម្រាប​ជូនសាធារណជនទាំងអស់មេត្តាជ្រាបថា៖ គណៈកម្មការនឹងធ្វើការជ្រើសរើស​​អ្នកស្ម័គ្រចិត្ត ចំនួន ៧,០០០នាក់ ដើម្បីចូលរួមសម្របសម្រួលនៅក្នុងព្រឹត្តិការណ៍កីឡាស៊ីហ្គេម លើកទី៣២ ដែលនឹងប្រព្រឹត្តទៅចាប់ពីថ្ងៃទី៥ – ១៧ ខែឧសភា ឆ្នាំ២០២៣ និងអាស៊ានប៉ារ៉ាហ្គេម លើក​ទី១២ ដែលនឹងប្រព្រឹត្តទៅចាប់ពីថ្ងៃទី៣ – ៩ ខែមិថុនា ឆ្នាំ២០២៣ នាពេលខាងមុខនេះ។ គណៈកម្មការចាប់ផ្តើមទទួលពាក្យចាប់ពីថ្ងៃទី០១ កុម្ភៈ – ០១ មីនា ឆ្នាំ២០២៣។

១. លក្ខណៈសម្បត្តិនៃការជ្រើសរើស

• អាយុចាប់ពី ១៨ឆ្នាំឡើងទៅ (គិតត្រឹម ខែមករា ឆ្នាំ២០២៣)
• មានពេលវេលាគ្រប់គ្រាន់
• មានសុខភាពល្អ ដើម្បីបំពេញការងារ
• មានឆន្ទៈ និងទំនួលខុសត្រូវខ្ពស់ក្នុងការងារ
• មានអាកប្បកិរិយាស្លូតបូត និងសុភាពរាបសា
• លើកទឹកចិត្តចំពោះជនមានពិការភាព អតីតគ្រូបង្វឹកកីឡា កីឡាករ និងកីឡាការិនី
• ចេះភាសាអង់គ្លេស(សម្រាប់អ្នកស្ម័គ្រចិត្តជាLO)

២. អត្ថប្រយោជន៍

• សម្ភារចាំបាច់សម្រាប់បំពេញការងារ
• លិខិតថ្លែងអំណរគុណ
• ចូលរួមព្រឹត្តិការណ៍មួយដ៏អស្ចារ្យ ជាប្រវត្តិសាស្ត្ររបស់កម្ពុជា និងជាមោទកភាពក្នុងនាមទទួលជាម្ចាស់ផ្ទះ
• ចូលរួមផ្សព្វផ្សាយពីកម្ពុជាទៅលើឆាកជាតិ និងអន្តរជាតិ
• បង្កើនទំនាក់ទំនងជាមួយមនុស្ស និងមជ្ឈដ្ឋានថ្មីៗ
• ពង្រឹងជំនាញទន់ និងជំនាញរឹងរបស់ខ្លួន ព្រមទាំងស្វែងយល់ពីចំណុចខ្លាំង និងចំណុចខ្វះខាត ដើម្បីធ្វើការអភិវឌ្ឍសមត្ថភាពរបស់ខ្លួន។

៣. ការបំពេញបែបបទចូលរួម

អ្នកស្ម័គ្រចិត្តដែលមានចំណាប់អារម្មណ៍ចូលរួម សូមបំពេញពាក្យស្នើសុំ ត្រូវភ្ជាប់ជាមួយនឹងរូបថត (៤×៦) អត្តសញ្ញាណ-ប័ណ្ណ ឬលិខិតឆ្លងដែន និងជីវប្រវត្តិសង្ខេប មកកាន់ទីស្នាក់ផ្ទាល់នៅអគារ The Kampus (ជាន់ទី៦) រៀងរាល់ម៉ោងធ្វើការ ឬបំពេញពាក្យស្នើសុំតាមរយៈដំណរភ្ជាប់ តាមរយៈការចុចចូលប៊ូតុង “ចុះឈ្មោះ”។